Kryetari i PDK-së, Memli Krasniqi, është shprehur i shokuar nga ngjarja e rëndë në shtëpinë e të moshuarve në Pejë, ku u keqtrajtua një grua nga një infermiere që punonte aty.
Krasniqi ka thënë se ky rast tregon problemet e thella që i ka shoqëria e Kosovës, teksa i ka kritikuar edhe institucionet, të cilat sipas tij, kanë dështuar ta monitorojnë shtëpinë e kujdesit.
“Dhuna ndaj një gruaje të moshuar nga personeli që do të duhej të kujdesej për të, tregon problemet e thella që ka shoqëria jonë. Për më shumë, dhembja është edhe më e madhe kur bëhet fjalë për keqtrajtimin e një nëne të dëshmorit të lirisë. Por, fatkeqësisht, këtu vihet në pah edhe paaftësia institucionale për të monitoruar institucionet e kujdesit për të moshuarit në mbarëvajtjen e punës”, ka shkruar Krasniqi.
Krasniqi ka theksuar se institucionet përgjegjëse e kanë obligim ta sigurojnë një ambient të sigurt për të moshuarit.
“Krahas vënies para përgjegjësisë për stafin e papërgjegjshëm që lënduan një zonjë të moshuar, institucionet përgjegjëse e kanë për obligim që të sigurojnë ambient të sigurt për të moshuarit që kanë nevojë për shërbime ndaj tyre në institucionet e tilla. Drejtësia duhet të veprojë fuqishëm sot, që nesër rastet e tilla të mos përsëriten”, ka thënë Krasniqi.
Në lidhje me këtë rast, gjatë ditës së mërkurë, janë arrestuar tre persona. Vajza që shihet në video teksa e godet gruan e moshuar, në polici ka deklaruar se këtë gjë e ka bërë nga vetëmbrojtja.
Ndërkaq, nga prokuroria e Pejës, kanë bërë të ditur se ekzistojnë dyshime reale se mund të ketë edhe raste të tjera që kanë qenë pre e dhunës.