Kryetari i Partisë Demokratike të Kosovës(PDK), Memli Krasniqi, përmes një videomesazhi për Vitin e Ri, ka thënë se është e natyrshme që në raste festash të përpiqemi t’i harrojmë përjetimet e vështira dhe të shpresojmë që jeta për secilin do të jetë më e mirë.
“Por e vërteta nuk duhet mohuar asnjëherë për të kuptuar më qartë rrugën që duhet të ndjekim, për t’u dalë në ballë sfidave dhe për të lartësuar atdheun tonë, burimin e pashtershëm të dashurisë dhe të ëndërrave tona”, ka thënë Krasniqi.
Krasniqi ka shtuar së ky vit nuk ishte i lehtë për shoqërinë dhe shtetin, i duke theksuar vështirësitë, nëpër të cilat, kaloi vendi gjatë këtij viti. Ai shtoi se i kupton dhe brengat e të rinjve, ku sipas tij, kjo duhet t’i shtyej për më shumë angazhim dhe vullnet në punë.
“Kosova ka kaluar dikur dhe sfida më të mëdha, të tilla që e vunë në pikëpyetje ëkzistencën tonë. Por besimi i madh në ëndrrat tona dhe në njëri-tjetrin, shpirti i sakrificës, dashuria e pamatshme për vendin, na kanë bashkuar për të arritur atë që dukej e pamundur, lirinë dhë shtetin”, ka theksuar kreu i PDK-së.
Krasniqi u ka uruar të gjithë qytetarëve Vitin e Ri, duke potencuar se urimet më të përzemërta ua dërgon luftëtarëve të lirisë që tashmë ndodhen në Hagë.
“Dhe me mall e nga larg, edhe këtë vit urimet më të përzemërta ua dërgoj luftëtarëve të lirisë që tash ndodhen në Hagë, e të cilët ia dhuruan Kosovës festën më të madhe, lirinë dhe pavarësinë, dinjitetin dhe krenarinë”, ka shtuar tutje ai.