Kremlini deklaroi të dielën se komentet e Sekretarit të Përgjithshëm të NATO-s, Mark Rutte, lidhur me përgatitjet për një luftë të mundshme me Rusinë janë të papërgjegjshme dhe tregojnë mungesë kuptimi për shkatërrimet e Luftës së Dytë Botërore.
Rutte, gjatë një fjalimi në Berlin të enjten, tha se NATO duhet të jetë “e përgatitur për përmasat e një lufte që përjetuan gjyshërit ose stërgjyshërit tanë” dhe theksoi se “ne jemi objektivi i radhës i Rusisë”, shkruan Reuters, transmeton Dukagjini.
Autoritetet ruse kanë hedhur poshtë në mënyrë të përsëritur pretendimet e NATO-s dhe të disa liderëve evropianë se Moska planifikon të sulmojë një vend anëtar të Aleancës, duke i cilësuar ato si “të pavërteta” dhe si një përpjekje për të nxitur histeri anti-ruse në Evropë.
“Kjo duket si një deklaratë nga një përfaqësues i një brezi që ka arritur të harrojë se çfarë ishte në të vërtetë Lufta e Dytë Botërore,” tha zëdhënësi i Kremlinit, Dmitry Peskov, për televizionin shtetëror rus, në një intervistë me gazetarin Pavel Zarubin.
“Ata nuk kanë kuptim të qartë për pasojat, dhe për fat të keq, zoti Rutte, me këto deklarata të papërgjegjshme, thjesht nuk e kupton se për çfarë po flet,” shtoi Peskov.