Krerët e institucioneve të vendit, si presidentja e Kosovës, Vjosa Osmani, kryeministri Albin Kurti, kryeparlamentari Glauk Konjufca e disa ministra të tjerë kanë zhvilluar një takim të hënën për situatën e krijuar në Veri të vendit.
Ky takim, sipas njoftimit, është mbajtur për t’u koordinuar në mes vete.
“Sot, Presidentja e Republikës së Kosovës, Vjosa Osmani, Kryetari i Kuvendit të Republikës së Kosovës, Glauk Konjufca, Kryeministri i Republikës së Kosovës, Albin Kurti, Zëvendëskryeministrja dhe Ministrja e Punëve të Jashtme dhe Diasporës, Donika Gërvalla Shwarz, si dhe Ministri i Punëve të Brendshme, Xhelal Sveçla kanë realizuar takim më qëllim të vazhdimit të koordinimit ndërinstitucional në lidhje me zhvillimet e fundit në vend”, thuhet në komunikatë.
Sipas njoftimit, në këtë takim kanë qenë të ftuar edhe liderët e partive opozitare të vendit, por ata nuk kanë marrë pjesë.
Megjithëkëtë, sipas komunikatës, institucionet e vendit do të vazhdojnë të kenë kontakte të rregullta me opozitën për cështjen e sigurisë në Veri të Mitrovicës.
“Në takim ishin të ftuar edhe liderët e opozitës të cilët nuk kanë marrë pjesë. Megjithatë, institucionet e vendit do të vazhdojnë kontaktet e rregullta dhe konsultimet me opozitën, me qëllim të koordinimit mbi çështje të interesit nacional. Po ashtu, do të vazhdohet koordinimi i plotë dhe komunikimi i rregullt me aleatët strategjik”, thuhet më tej në komunikatë.
Ndërkaq, me kërkesën e ambasadorit të ShBA-së, Jeff Hovenier, Qeveria e Kosovës e ka shtyrë vendimin për reciprocitet me targa dhe për dokumente të indentifikimi deri në datën një shtator. Ndërkaq, të hënën janë larguar të gjitha barrikadat e vendosura në pikat kufitare të veriut.