Kryesia e Kuvendit ka vendosur për dy seanca plenare gjatë kësaj jave, njëra do të mbahet me datën tre gusht kurse tjetra me datën katër.
Në seancën e së mërkurës do të vazhdohet trajtimi i pikave të papërfunduara, ndërsa të enjten do të mbahet një seancë e re parlamentare me pika të reja.
“Rendi i ditës i kësaj seance, përveç pikave të zakonshme, deklarime jashtë rendit të ditës dhe pyetje parlamentare, përmban një mori pikash të tjera, përfshirë projektligje, një interpelancë dhe çështje të tjera nga fushëveprimtaria e Kuvendit”, thuhet në njoftimin e Kuvendit të Kosovës.
Në seancën e re të radhës pritet të shqyrtohet edhe propozim-vendimi i qeverisë për masat emergjente në furnizimin me energji elektrike.
Seanca e së enjtes do të jetë seanca e fundit e këtij sesioni pranveror, potencialisht mund të zhvillohet edhe një seancë tjetër një ditë pas, për ta vazhduar seancën nëse pikat e rendit të ditës nuk arrijnë të përfundohen.
Në seancën e së enjtes në shqyrtim do të jenë edhe 20 projektligje të reja, derisa është e paraparë të mbahet edhe interpelancë me ministrin e Punëve të Brendshme, Xhelal Sveçla, për çështjen “Ligji i zyrtarëve publikë”, kërkesë kjo e GP të AAK-së.