Zëdhënësi i Qeverisë së Kosovës, Përparim Kryeziu, i është kundërpërgjigjur zëdhënësit të BE-së, Peter Stano, i cili tha se masat ndëshkuese ndaj Kosovës nuk hiqen kur duan politikanët e Kosovës.
Kryeziu tha se Kosova është ndëshkuar padrejtësisht për veprimet në veri. Ai i ka publikuar dy foto ilustruese, një të vitit 2023 dhe një të prillit 2024.
“Rasti është shumë i thjeshtë. Bashkimi Evropian i ka vendosur masa Kosovës, sepse e ka fajësuar atë, padrejtësisht, për eskalimin e situatës që shihet në foton e parë (maj 2023). Ndërkaq, në foton e dytë, mund të shihet kryetari i Komunës së Zveçanit, Ilir Peci, pranë të njëjtës ndërtesë duke lëvizur i papenguar (prill 2024)”, tha ai.
Kryeziu ka theksuar se deeskalimi ka ndodhur dhe se “Prandaj është po aq e qartë që masat ndaj Kosovës duhet të hiqen”.
