Drejtori i Institutit Demokratik të Kosovës (KDI), Ismet Kryeziu, ka thënë se nëse dy partitë opozitare, Lidhja Demokratike e Kosovës (LDK) dhe Aleanca për Ardhmërinë e Kosovës (AAK) nuk kanë fuqi politike për të nxitur dorëheqjen e kryeministrit Albin Kurti dhe refuzojnë votën e tyre për shpërndarjen e kësaj legjislature, atëherë alternativa e tyre është që kjo qeveri ta përfundojë mandatin qeverisës dhe të shkohet në zgjedhje të rregullta.
Në një postim në Facebook, Kryeziu ka theksuar se nëse këto parti i kanë renditur argumentet për dështimet e kësaj qeverie, alternativën politike nuk duhet ta fokusojnë në formën se si i ndërpritet mandati kësaj qeverie.
“Nëse tani i kanë të renditura shumë argumente për ngecjet dhe dështimet e kësaj qeverie, në disa fusha të politikëbërjes, si: në zhvillimin ekonomik, në qeverisjen llogaridhënëse, transparente dhe pa korrupsion, fuqizimin e aleancave dhe partneritetit ndërkombëtar, rrugëtimin euroatlantik, anëtarësimin në KiE, dialogun me Serbinë etj.. S’di pse alternativën e tyre politike duhet ta fokusojnë në formë, se si i ndërpritet mandati kësaj qeverisje!? Gjithnjë forma ka rëndësi se si një veprim politik pranohet dhe perceptohet nga publiku, por jo mbi përmbajtjen. Përmbajtja është thelbësore në politikë”, ka thënë Kryeziu.
Tutje ai ka thënë se më shumë sesa forma se si të arrihet ndërprerja e një mandati të një qeverie, politikisht për opozitën është zgjidhje më e mençur, ndërprerja e një mandati të qeverisë para kohe, sesa shkuarja në zgjedhje të rregullta.
“Më shumë se sa forma, se si të arrihet ndërprerja e një mandati të një qeverie, politikisht për opozitën është zgjidhje më e mençur ndërprerja e një mandati të qeverisë para kohe, se sa shkuarja në zgjedhje të rregullta. Dhe përmbyllja e një mandati qeverisës dhe shkuarja në zgjedhje të rregullta, janë formë e ndikimit dhe perceptimit në publik!?”, ka vijuar tutje Kryeziu.