Pedagogu dhe dirigjenti, Bahri Çela, kujtohet në 4-vjetorin e ndarjes nga jeta. Ai konisderohet një nga muzikantët më meritor që ka vënë themelet e institucionit të Filharmonisë së Kosovës.
Çela ishte njëri prej dirigjentëve më me ndikim prej viteve të 70-ta e deri pas luftës së fundit në Kosovë. Ai fillimisht kishte drejtuar orkestrën dhe korin e Radiotelevizionit të Prishtinës, e më pastaj së bashku me një grup muzikantësh kosovar kishte themeluar Filharmoninë e Kosovës.
Studimet universitare i kishte përfunduar në Akademinë e Muzikës, dega e Dirigjimit në Beograd, për të vazhduar më pas specializimin në Konservatorin e Shën Petërsburgut në Rusi, te pedagogu i njohur Prof. A.P. Musin dhe në Francë te dirigjentët e njohur francezë P. Dervaux dhe F. Quatrocchi.
Ndërkaq pas studimeve ishte punësuar në Radio Prishtinë si producent i muzikës serioze dhe asaj për fëmijë. Çela poashtu ishte njëri ndër iniciatorët e themelimit të Orkestrës Simfonike të Radiotelevizionit të Prishtinës në vitin 1975.
Për një kohë ai ishte edhe dirigjent i Orkestrës Simfonike duke realizuar koncerte të rregullta me vepra të autorëve shqiptarë dhe botërorë. Në mesin e tyre hyjnë emra si Rexho Mulliqi, Vincent Gjini, Esat Rozvanolli, Rauf Dhomi, Akil Koci, Çesk Zadeja e të tjerë.