Kryeministri i Kosovës, Albin Kurti, do t’i takojë përfaqësuesit politik nga Lugina e Preshevës, një javë pas mbajtës së zgjedhjeve në Serbi ku shqiptarët nuk arritën të kenë asnjë përfaqësues në Kuvendin serb.
Në takim Kurti ka ftuar Ardita Sinanin, Ragmi Mustafën, Sami Salihun, Shqiprim Arifin, Naser Hazirin, Shaip Kamberin, Nagip Arifin dhe Shqiprim Musliun.
Gjendja e shqiptarëve të Luginës së Preshevës thuhet se do të jetë tema kryesore e diskutimit mes Kurtit dhe liderëve politik të Luginës.
Nga ana tjetër, për sot është thirrur seancë e jashtëzakonshme nga Kuvendi Komunal i Preshevës për shkarkimin e kryetares së tanishme, Ardita Sinani.
“Duke qenë se si përfaqësues politikë nga Lugina e Preshevës jemi të ftuar nesër në takim në Prishtinë nga ora 8:00, nga kryeministri i Republikës së Kosovës, Albin Kurti, ku kam konfirmuar pjesëmarrjen time. E njoftoj opinionin publik se së bashku me Munir Rexhepi, shef i Grupit të Këshilltarëve të Partisë për Veprim Demokratik në Kuvendin Komunal të Preshevës, kemi kërkuar sot nga kryetari i Kuvendit Komunal, Sami Salihu, që ta shtyjë seancën për një kohë më të përshtatshme, meqë është e pamundur të jem e pranishme fizikisht në ora 10:00 në Preshevë”, ka shkruar Sinani në rrjetin social Facebook.
