Misioni i NATO-s në Kosovë, KFOR, ka përsëritur qëndrimin e tij se hapja e Urës së Ibrit në Mitrovicë për automjete duhet të bëhet vetëm përmes dialogut dhe në koordinim me komunitetin ndërkombëtar.
Kjo deklaratë e KFOR-it erdhi pas komenteve të kryeministrit Albin Kurti, i cili, gjatë një vizite në veri të Kosovës, tha se Qeveria ka përfunduar të gjitha procedurat e nevojshme për hapjen e urës dhe tani është në pritje të vendimit nga QUINT-i dhe KFOR-i.
“Për çështjen e hapjes së mundshme të urës së lumit Ibër në Mitrovicë për automjete, qëndrimi ynë ka qenë transparent dhe konsistent gjatë gjithë kohës. Çdo vendim në këtë drejtim duhet të merret përmes dialogut dhe në koordinim në kohë dhe efektiv me Komunitetin Ndërkombëtar”, thuhet në njoftim.
Misioni i NATO-s njoftoi gjithashtu se do të vazhdojë të mbajë prezencë të përhershme në urë dhe do të kryejë patrullime të rregullta në zonat përreth. Në njoftim thuhet se disa aktivitete trajnuese së fundmi mbi urë, ishin pjesë e operacioneve të rregullta për t’i testuar procedurat operacionale dhe për të ruajtur gatishmërinë e trupave.
“Në ndërkohë, KFOR-i do të mbajë prezencën e tij fikse në urë dhe do të vazhdojë të kryejë patrullime të rregullta në zonat përreth.
Së fundmi, disa aktivitete trajnuese janë kryer nga personeli i KFOR-it në urë. Këto ishin pjesë e aktiviteteve tona të rregullta të krijuara për të testuar procedurat operacionale afatgjatë dhe për të ruajtur standardin më të lartë të gatishmërisë së trupave tona”.