Kryeministri i Kosovës, Albin Kurti ka thënë se Kosova ka shënuar arritje në indeksin e Bankës Botërore të Maturitetit të Teknologjisë në Qeveri (GTMI).
Kurti ka shkruar se Kosova është kategorizuar në grupin B të vendeve me fokus të konsiderueshëm në qeverisje digjitale.
Deri më tash sipas Kurtit, Kosova ka qenë e renditur në grupin C.
“Në indeksin e Bankës Botërore të Maturitetit të Teknologjisë në Qeveri (GTMI), Kosova është kategorizuar në grupin B të vendeve me fokus të konsiderueshëm në qeverisje digjitale. Rezultatet që janë publikuar sot, tregojnë progresin që ka arritur Kosova në dy vitet e fundit në 48 indikatorët kyç të indeksit të cilat mbulojnë fushat si sistemet qeveritare, shtytësit kryesorë të digjitalizimit në qeveri dhe ofrimi i shërbimeve publike. Në matjen paraprake të indeksit GTMI për vitin 2020, Kosova ka qenë e kategorizuar në grupin C të vendeve me fokus të kufizuar në qeverisje digjitale”, ka shkruar Kurti.
Kurti ka thënë se “strategjia e re dhe plani i veprimit për qeverisje elektronike që janë duke u përgatitur, do të ofrojnë udhërrëfyesin për avancimin gjithëpërfshirës të digjitalizimit në qeveri”.
Kryeministri i Kosovës ka theksuar se digjitalizimi është një nga shtyllat kryesore të planit qeverisës derisa shtoi se janë duke punuar për ta ngritur efikasitetin dhe transparencën e administratës publike si dhe përmirësimin e shërbimeve për qytetarë dhe biznese.