Në Samitin e Investimeve në Ballkanin Perëndimor në Londër, kryeministri Albin Kurti ka theksuar se Kosovën e njohin tri nga katër vendet fqinje dhe se vendi njihet si Republika e Kosovës dhe jo si ‘Kosova e Metohija’.
Kurti ka thënë se nëse do të referohej Kosova me emrin ‘Metohija’, atëherë edhe Serbia do të duhej të referohej ndryshe.
“Vendi im quhet Republika e Kosovë, jo si i është referuar këtu ‘Kosova e Metohija’. Po të shkoja në këtë rrugë do të merrja shumë kohë, pasi pos Serbia, do të duhej të thosha Serbia e Vojvodina, Sanxhaku, Toplica Rashka dhe Lugina e Preshevës”, ka deklaruar Kurti.
“Me mirë të përqendrohemi në ekonomi pra”, ka shtuar tutje Kurti.
Në panelin ku para tij kishte folur kryeministrja e Serbisë, Ana Brnabiq, Kurti ka përmendur se Kosova nuk ka lidhje me Federatën Ruse dhe ka theksuar se ata e përkrahin Ukrainën në luftën e tyre.
Po ashtu, ai ka shtuar se vendi dëshiron që Ukraina të fitojë dhe të shohin një botë demokratike të Evropës, duke sfiduar Kremlinin.