Kryeministri në detyrë i Kosovës, Albin Kurti, ka kujtuar 36-vjetorin e shpalljes së Republikës së Kosovës më 7 shtator të vitit 1990 në Kaçanik.
Kurti ka thënë se 36 vite më parë, delegatët e zgjedhur të Kuvendit të Kosovës e shpallën Kosovën republikë dhe miratuan kushtetutën e saj.
“U bënë 36 vite nga dita kur delegatët e zgjedhur të Kuvendit të Kosovës, e shpallën Kosovën republikë dhe e miratuan një kushtetutë për të”, ka shkruar Kurti.
Ai ka rikujtuar se më 7 shtator 1990, 80 nga 111 delegatët e Kuvendit të Kosovës u mblodhën në mënyrë të fshehtë në Shtëpinë e Kulturës në Kaçanik, ku unanimisht miratuan dokumentin kushtetues dhe shpallën Kosovën republikë.
“Më 7 shtator të vitit 1990, dy muaj pas miratimit të deklaratës kushtetuese të 2 korrikut, 80 delegatë të Kuvendit të Kosovës nga 111 sa ishin gjithsej, arritën të mblidhen në Shtëpinë e Kulturës në Kaçanik, në një mbledhje të fshehtë, në të cilën unanimisht e miratuan një dokument kushtetues të sapohartuar dhe e shpallën Kosovën republikë”, ka shkruar ai.
Sipas Kurtit, ky akt politik dhe juridik ishte kundërvënie ndaj regjimit të atëhershëm të Serbisë, i cili një vit më parë kishte suprimuar autonominë e Kosovës.
“Me këtë akt politik të deklarimit të Republikës së Kosovës, i pasuar nga akti juridik i miratimit të kushtetutës së saj, ata iu kundërvynë regjimit okupator të Serbisë që një vit më parë ia kishte suprimuar autonominë Kosovës. Kështu autonomia e fituar më 1974 dhe e suprimuar më 1989, u zëvendësua me republikë më 1990”, ka deklaruar Kurti.
Kryeministri në detyrë e ka cilësuar atë si republikën e parë të Kosovës, e cila, sipas tij, u shndërrua në një republikë të rezistencës, fillimisht paqësore e më pas të armatosur.
“Kjo do të ishte e para republikë e Kosovës, një republikë që rezultoi të ishte republikë për rezistencë, njëherë paqësore e mandej e armatosur, kulmuar me luftën çlirimtare dhe të drejtë të popullit tonë të organizuar nga Ushtria Çlirimtare e Kosovës, më 1998 dhe 1999”, ka shkruar ai.
Kurti ka theksuar se më 17 shkurt 2008, Republika e Kosovës e shpallur në Kaçanik u ripërtëri si shtet i pavarur, sovran dhe demokratik.
“Do të duhej të vinte 17 shkurti i vitit 2008, që republika e Kosovës e shpallur më 7 shtator 1990 në Kaçanik, të ripërtrihej në Republikën e Kosovës shtet të pavarur, sovran dhe demokratik, të njohur nga 121 shtete të botës deri më tani”, ka shkruar Kurti.
Ai ka shprehur mirënjohje për brezin që kontribuoi dhe u angazhua për Republikën e Kosovës gjatë viteve ’90.
Kujtojmë me mirënjohje brezin kontribues e të angazhuar për Republikën e Kosovës gjatë viteve ’90, me urimet më të mira për të ardhmen politike të republikës sonë sot!”, shtuar Kurti.