Pas votimit në lexim të parë të Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme, ka reaguar kryeministri Albin Kurti, i cili ka thënë se projektligji do t’i marrë për bazë rekomandimet e Komisionit të Venecias dhe do të jetë në përputhje me praktikat ndërkombëtare.
“Me rekomandimet e vlefshme të Komisionit të Venecias, ky Projektligj do të standardizohet plotësisht në përputhje me praktikat më të mira ndërkombëtare dhe, po ashtu, do ta rrisë efikasitetin e luftimit të korrupsionit, siç ka qenë zotimi ynë, e për të cilin jemi maksimalisht të përkushtuar”, ka shkruar Kurti në Facebook.
Kurtit ka thënë se me miratimin e këtij projektligji, do të mundësohet konfiskimi civil i pasurisë, sipas tij, pa dënim nëse nuk mund të justifikohet.
Kurti i ka falënderuar deputetët e Kosovës edhe për votimin e Projekt-kodit të Procedurës Penale, i cili sipas tij, po ashtu është në përputhje me praktikat dhe standardet evropiane.
Sipas kryeministrit, ky Projekt-kod, do të kontribuojë në ndëshkimet e rasteve korruptive.
“Një vëmendje të veçantë i është kushtuar të drejtave të palëve në procedurë, në veçanti të drejtave të palëve të dëmtuara apo viktimave”, thuhet në reagimin e kryeministrit.
Në fund, Kurti seancën e së enjtes e ka konsideruar si të suksseshme, duke e përmendur edhe projektligjin për Vettingun, për të cilin tha se duhen konsultime me partitë opozitare.