Kryeministri i Kosovës, Albin Kurti, gjatë vizitës së tij në Qendrën Klinike Universitare të Kosovës(QKUK), ka treguar se si është duke u sulmuar drejtori i Auditimit të ShSKUK-së Musa Vitija, të cilit iu dogj vetura dy herë.
“Këtu jam se bashku me Musa Vitija, i cili është drejtori i Njësisë për Auditim, e të cilit të premten për herë të dytë iu dogj vetura në oborrin e ndërtesës. Herën e parë më 19 gusht i është djegur vetura të njëjtit zyrtar, dhe tash po i digjet vetura për herë e dytë, këtij drejtori, i cili me raportet e sakta të auditimit ku ka gjetur shkelje ”, ka thënë Kurti.
Më tej, ai ka theksuar se gjetjet e drejtorit Vitija, i kanë shqetësuar të korruptuarit.
“Nuk bëhet për gabime, por bëhet fjalë për shkelje, të cilat janë evidentuara dhe tash ne i ftojmë organet përgjegjëse të Republikës së Kosovës, që t’i vazhdojnë hulumtimet për t’i ndjekur keqbërësit dhe përfundimisht për t’i dënuar ata”, ka theksuar Kurti.
Ai e ka theksuar mbështetjen e tij të plotë për drejtorin e Auditimit në SHSKUK, Musa Vitija.
Ndërkaq, Kurti ka treguar se sa është numri i atyre që përfitojnë nga barnat që i siguron QKUK-ja.
“Në mënyrë të rregullt vazhdojnë që 16 mijë e 500 pacientë me sëmundje kronike që t’i furnizojmë më barna, dhe gjithashtu 15 mijë e 231 pacientë me diabet me tri lloje të insulinave.