Pas arrestimit të një serbi në veri, të cilit iu konfiskuan nga Policia e Kosovës mbi 6 mijë fishekë në veturën e tij, ka reaguar kryeministri i Kosovës, Albin Kurti.
Përmes një postimi në Twitter, kreu i Qeverisë së Kosovës ka thënë se kjo është një tjetër fitore për sundimin e ligjit.
“Një tjetër fitore për sundimin e ligjit: Policia e Kosovës ka arrestuar një trafikant armësh që tentoi të kontrabandonte 6300 plumba nga Serbia. Qeveria jonë ka zero tolerancë për trafikimin e armëve dhe drogës, krimin e organizuar dhe çdo përpjekje për të mbështetur dhunën ose konfliktin – kudo në territorin tonë”, ka shkruar Kurti.
Ndryshe, të martën e 21 shkurtit, një serb është arrestuar në fshatin Jashanicë të Leposaviqit, në një pikë kontrolli të Policisë-Kufitare në Veri.
Policia ka ndaluar automjetin me targa të Serbisë që po e drejtonte një mashkull serb, të cilit i kanë gjetur afro 6300 copë fishekë.
Të njëjtin e kanë shoqëruar në polici dhe pas intervistimit i është inicuar rasti penal dhe është dërguar në mbajtje deri në 48 orë.
Arrestohet një serb në veri, i konfiskohen mbi gjashtë mijë fishekë