Kryeministri i Kosovës, Albin Kurti, i ka rikujtuar masakrat e Paklekut të ri dhe të Studimes, që u kryen nga forcat serbe 25 vjet më parë.
Në Paklek të ri janë vrarë dhe zhdukur me forcë dhjetë shqiptarë, kurse për fatin e nëntë të tjerëve ende nuk dihet asgjë.
Në Studime të Shtimes, forcat serbe kishin masakruar 13 anëtarë të familjes Gërxhaliu, në mesin e tyre, shtatë ishin fëmijë.
Kurti tha se këto masakra sikurse gjithë të tjerat që kanë ndodhur janë dëshmi e krimeve çnjerëzore që i ka kryer Serbia në Kosovë.
“Këto masakra, vrasje e zhdukje me forcë, sikurse edhe të gjitha masakrat tjera në Kosovë, janë dëshmi e pamohueshme e krimeve të luftës, krimeve kundër njerëzimit dhe gjenocidit të shtetit të Serbisë ndaj shqiptarëve gjatë luftës 1998-1999 në Kosovë”, ka thënë ai.
Tutje, Kurti u shpreh se “trupi i Kosovës i gjithi është i mbushur me plagë, të cilat për t’u shëruar kanë nevojë për drejtësi. Drejtësia është i vetmi ilaç. Është themeli i qëndrueshëm për paqe”.