Kryeministri i Kosovës, Albin Kurti, ka pritur në takim presidentin e Shqipërisë, Bajram Begaj, për të cilin ka thënë se është i mirëseardhur gjithmonë në vendin tonë.
Kurti ka theksuar se Kosova është mirënjohëse gjithmonë ndaj Shqipërisë për kontributin e dhënë në të gjitha etapat që ka kaluar vendi.
Po ashtu, kreu i Qeverisë së Kosovës ka thënë se 25-vjetorin e çlirimit të vendit e kanë festë të përbashkët.
“Presidenti i Republikës së Shqipërisë, Bajram Begaj është gjithnjë i mirëseardhur. Duke qenë edhe ushtarak edhe mjek, e di shumë mirë 12 qershorin e vitit ’99 dhe të falënderoj nga zemra zotëri president. Edhe këtë festë e kemi bashkë”, ka deklaruar Kurti.
Ndërsa, presidenti Begaj ka shfrytëzuar rastin që të përgëzojë Kosovën për të arriturat si shtet.
“Sot është dita e rilindjes së Kosovës, e vënies në vend të padrejtësisë shekullore që u mundësua me gjakun, sakrificën e heronjve të UÇK-së. Unë dua të përgëzoj Kosovën për gjithçka çka ka bërë deri tani për të patur mirëqenie dhe prosperitet”, ka thënë ai.
Presidenti i Shqipërisë po qëndron në Kosovë për nder të 12 qershorit, ditës së çlirimit.
Parakalimi i FSK-së dhe Policisë së Kosovës përmes fotografive