Kryeministri i Kosovës, Albin Kurti, të martën e 11 tetorit, ka pritur në takim ambasadorin e Francës, Olivier Guerot, me të cilin, ka diskutuar për qëndrimin e qeverisë dhe presidencës franceze në raport me Kosovën.
Është gatishmëri e të dyja shteteve për të pasur më shumë prezencë të Francës në Kosovë, thuhet në komunikatën që Qeveria e Kosovës ka publikuar të martën, pas takimit që kryeministri Albin Kurti ka pasur me ambasadorin francez, Olivier Guerot.
Sipas njoftimit të zyrës së kryeministrit, ambasadori Guerot “rikonfirmoi qëndrimin e Presidencës dhe Qeverisë franceze për shtim të angazhimit dhe rol më aktiv në Ballkanin Perëndimor në përgjithësi, dhe në Kosovë në veçanti”.
Ndërkaq, kryeministri Kurti ka shprehur mirënjohje për angazhimin e presidentit të Francës, Emmanuel Macron, për liberalizimin e vizave, si dhe për përfshirjen në dialogun me Serbinë.
“Kryeministri Kurti shprehu mirënjohje për angazhimin e Presidentit Macron, të shprehur në qershor, për të mbyllur çështjen e kahershme të liberalizimit të vizave për Kosovën. Ai vlerësoi lart përfshirjen e ripërtërirë franko-gjermane në rajon, për procesin e Berlinit dhe për zgjidhjen e dialogut me Serbinë, duke theksuar se Kosova mbetet e përkushtuar dhe konstruktive në këto procese”, thuhet në njoftim.
Në këtë takim njashtu thuhet se është rikonfirmua gatishmëria e dy shteteve, për të pasur më shumë prezencë të Francës në Kosovë, duke përfshirë këtu edhe investitorët francezë. Kryeministri ka potencuar se mirëpret përfshirjen e Agjencisë Franceze të Zhvillimit, si një aktor të rëndësishëm.
“Gjatë takimit u rikonfirmua edhe gatishmëria e të dy shteteve, për të pasur më shumë prezencë të Francës në Kosovë, përfshirë edhe investitorët francezë, e duke theksuar potencialin e mërgatës nga Kosova. Në këtë drejtim, kryeministri potencoi se mirëpresim përfshirjen e Agjencisë Franceze të Zhvillimit, si një aktor i rëndësishëm”, thuhet më tej në komunikatë.
Gjatë takimit, u bisedua edhe për bashkëpunim, në mënyrë specifike mes Ministrive të Drejtësisë, si dhe për aktivitete të shumta në kulturë e sport.
“Po ashtu, u veçua bashkëpunimi shkencor në misionin arkeologjik Francë-Kosovë, si dhe nisma e qershorit të kaluar me kryetarët e komunave, që duket premtues për sa i përket binjakëzimit dhe urave të ardhshme mes komunave dhe shteteve tona”, thuhet në komunikatë.