Kryeministri i Kosovës, Albin Kurti, ka pritur të hënën në takim lamtumirës ambasadorin e Norvegjisë në Kosovë, Jens Erik Grondahl.
Siç njofton Zyra e Kryeministrit, Kurti ka falënderuar ambasadorin Grondahl për bashkëpunimin e shkëlqyer në mes të dyja vendeve, si dhe për angazhimin dhe përkushtimin e tij në këtë drejtim, duke i uruar atij suksese në angazhimet dhe përgjegjësitë e radhës.
“Krahas takimit në zyrën e tij të pritjeve, kryeministri për nder të ambasadorit Grondahl, shtroi edhe një mëngjes të përbashkët edhe me këshilltarët e angazhuar në Qeveri nëpërmjet mbështetjes së Ambasadës norvegjeze”, thuhet në njoftimin e ZKM-së.
Kurti, ndër të tjera, ka shprehur mirënjohjen e thellë të tij për kontributin e shtetit norvegjez, teksa ka ritheksuar se Norvegjia është dhe “mbetet partnerja e rëndësishme, me të cilën ndan vlera, bindje dhe pikëpamje për sigurinë dhe paqen në rajon e më gjerë”.
Në këtë takim ishte i pranishëm edhe zëvendëskryeministri Besnik Bislimi, i cili po ashtu falënderoi ambasadorin Grondahl për bashkëpunimin në mes të dy vendeve.