Kryeministri i Kosovës, Albin Kurti, ka pritur në takim kryetarin e Aleancës për Shqiptarët, Arben Taravari dhe deputetin nga radhët e këtij subjekti, Halil Snopçe.
Në komunikatën për media nga zyra e kryeministrit thuhet se ky takim u zhvillua pas homazheve që bënë bashkë te varri i Astrit Deharit, ndërsa në të u trajtuan shumë tema aktuale dhe me interes.
“Sfidat me të cilat përballen dy vendet tona janë të përbashkëta, ndajmë shqetësimin e njëjtë dhe vizionin e njëjtë për të ardhmen e qytetarëve tanë dhe mbarë rajonit”, thuhet në komunikatë.
Sipas komunikatës, u bisedua për raportet ndërmjet dy vendeve dhe avancimin e tyre përmes intensifikimit të bashkëpunimit dhe projekteve të përbashkëta.
“Lidhjet infrastrukturore kanë rëndësi të veçantë jo vetëm për qytetarët por edhe për ekonominë e dy vendeve tona. Koordinimi dhe sinkronizimi i politikave zyrtare kontribon në tejkalimin e probleme dhe gjetjen e zgjidhjeve më të mira për të ardhmen edhe të mbarë rajonit”, vijon komunikata.