Kryeministri i Kosovës, Albin Kurti, gjatë takimit me përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajçak, ka shprehur pritshmëritë e tij që në takimin e 18 marsit në Ohër të nënshkruhet marrëveshja për normalizimin e marrëdhënieve ndërmjet Kosovës dhe Serbisë.
Siç ka njoftuar Zyra e Kryeministrit, gjatë takimit të tyre është diskutuar për përgatitjen e takimit të nivelit të lartë të caktuar për datën 18 mars në Ohër të Maqedonisë së Veriut.
Kryeministri Kurti ka theksuar gatishmërinë e tij dhe të Qeverisë që të jetë një palë konstruktive, e përgjegjshme dhe e përkushtuar në parimet e demokracisë liberale e të vlerave të Bashkimit Evropian.
Ndërsa, Lajçak pas takimit me Kurtin ka thënë se qëllimi kryesor i vizitës ishte ta ketë të qartë se si Kosova e sheh implementimin e marrëveshjes, derisa shtoi se takimi i ka përmbushur pritshmëritë e tij sa i përket kësaj çështjeje.
“Teksti ishte pranuar dhe u publikuar, të gjithë e dinë çfarë përmban. Po ashtu u pajtuam të takohemi dhe të shikojmë si do të impelementohet, cilët janë hapat, dhe për kohën, ndryshe do të ishte marrëveshje politike dhe joformale. Qëllimi i vizitës ishte diskutimi i zbatimit me Kurtin, kishim bisedë konstruktive dhe të rëndësishme për këtë çështje”, ka thënë ai.
“Qëllimi kryesor i vizitës ishte të shohim si e sheh Kosova implementimin, takimi i ka përmbushur pritshmëritë e mia në këtë kontekst, pastaj do të shkoj në Serbi të shoh. Tash shoh më mirë për pritshmëritë e Kosovës për implementimin”, ka vijuar ai.
Po ashtu, Lajçak ka bërë të ditur se në rast se të dyja palët pajtohen, më 18 mars pritet të nënshkruhet marrëveshja.