Kryeministri i vendit, Albin Kurti ka deklaruar se Projektligji për Çmimet Tavan, i miratuar një ditë më parë nga Qeveria, nuk ka për qëllim të pengojë zhvillimin ekonomik, por të ndalë abuzimet që mund të bëhen në emër të krizave dhe rritjen artificiale të çmimeve.
Përmes një postimi në Facebook, Kurti bëri të ditur se ekzekutivi ka miratuar edhe Projektligjin për Sigurimet Shëndetësore, duke i vlerësuar të dyja si nisma të domosdoshme dhe me rëndësi të veçantë.
Ai rikujtoi se këto projektligje ishin miratuar edhe në mandatin e kaluar, por u kontestuan në Gjykatën Kushtetuese, duke u vonuar deri më tani.
Sipas Kurtit, Projektligji për Çmimet Tavan synon të parandalojë keqpërdorimet dhe manipulimet me çmime gjatë periudhave të krizave, ndërsa Projektligji për Sigurimet Shëndetësore konsiderohet jetik për mirëqenien e qytetarëve dhe funksionimin e sistemit publik shëndetësor.
“Shpresojmë që Kuvendi t’i shqyrtojë sa më shpejt dhe të mundësojë hyrjen e tyre në fuqi pa vonesa”, ka shkruar Kurti.