Kryeministri i Republikës së Kosovës, Albin Kurti, të martën e 14 shkurtit në zyrën e tij, ka pritur zëvendës asistentin për çështje politike dhe politika të sigurisë të Sekretarit të Përgjithshëm të NATO-s, Javier Colomina.
Kurti e ka falënderuar Colominan për mbështetjen e vazhdueshme të NATO-s për Kosovën si dhe kontributin në ruajtjen e paqes dhe sigurisë në Ballkanin Perëndimor.
Siç njofton Zyra e Kryeministrit, Kurti e ka njoftuar atë “për situatën e sigurisë në vend, për synimet e institucioneve të vendit, për anëtarësim në Bashkimin Evropian dhe NATO si dhe vendosmërinë e Qeverisë së Kosovës për të luftuar korrupsionin dhe krimin e organizuar në tërë territorin e Kosovës”.
Ndër të tjera, Kurti ka theksuar përkushtimin e qeverisë për zhvillim të mbrojtjes dhe sigurisë.
“Kryeministri Kurti gjithashtu theksoi përkushtimin e qeverisë për zhvillimin e kapaciteteve të mbrojtjes dhe sigurisë si dhe vullnetin për të kontribuar për paqen dhe sigurinë në botë, krahë NATO-s dhe partnerëve”, theksohet në njoftimin e kryeministrisë.
Bëhet e ditur se në takimin me z. Colomina dhe ekipin e tij, kryeministri Albin Kurti u shoqërua nga Koloneli i Forcës së Sigurisë së Kosovës, Ejup Maqedonci.