Pas takimit me presidentin e Zvicrës, Alain Berset, kryeministri i Kosovës, Albin Kurti, së bashku me ministrin e Kulturës, Rinisë dhe Sportit, Hajrulla Çeku, janë takuar me kandidatët shqiptarë në zgjedhjet federale 2023.
“Në një bashkëbisedim të hapur, kryeministri Kurti i përgëzoi ata për angazhimin e tyre publik e politik në Zvicër, duke e konsideruar atë si dëshmi të mirëintegrimit të shqiptarëve atje, por edhe si shumë të rëndësishëm për demokracinë”, ka njoftuar Kryeministria.
Në këtë takim është diskutuar për lidhjet në mes të Kosovës dhe Zvicrës, dhe rolin e potencialin e bashkëpunimit ndërmjet Qeverisë dhe mërgatës në fushën e ekonomisë, të edukimit dhe të shëndetësisë.
“Kryeministri i njoftoi të pranishmit me disa prej zhvillimeve kryesore në vend dhe politikave prioritare të qeverisë, teksa nga kandidatët u njoftua më shumë për temat e tyre elektorale”, thuhet tutje në njoftim.
Kreu i ekzekutivit u ka uruar të gjithë kandidatëve suksese në fushatën zgjedhore dhe në ditën e zgjedhjeve.
Në zgjedhjet e 22 tetorit janë 30 kandidatë shqiptarë nga pothuajse secila parti politike që garojnë për ulëse në Këshillin Kombëtar.