Kryeministri i vendit, Albin Kurti, në një mëngjes pune është takuar me përfaqësues të agjencive të Kombeve të Bashkuara në Kosovë me në krye koordinatoren Arnhild Spence.
Në komunikatën për media nga Zyra e Kryeministrit bëhet e ditur se temat e diskutuar kanë qenë prioritetet dhe projektet e Qeverisë dhe bashkëpunimi me këto agjenci në avancimin e tyre.
Në veçanti, sipas njoftimit, thuhet se është diskutuar për bashkëpunimin në zhvillimin ekonomik përmes mbështetjes ndaj bizneseve e turizmit, sidomos në pjesën veriore të vendit tonë. Po ashtu, është diskutuar për zhvillimin e transportit urban për lidhjen më të mirë ndërmjet lagjeve e qyteteve.
“Kurti i ka informuar të pranishmit rreth punës më shumë se trevjeçare të qeverisë dhe progresin e arritur i cili është dëshmuar edhe nga rangimi i Kosovës në indekse e matje ndërkombëtare, duke u udhëhequr mbi parime të demokracisë, mirëqenies sociale, sundimit të ligjit dhe mundësive të barabarta për të gjithë qytetarët pa dallim”, thuhet në komunikatën për media.
Kurti po ashtu ka përmendur edhe krijimin e 15 mijë vendeve të reja të punës edhe përmes platformës “Superpuna”, rritjen e punësimit për gratë, ku me masat e qeverisë u mbështet punësimi i mbi 12 mijë grave.
Ai shtoi se edhe në veriun e vendit po punohet për rritjen e vendeve të punës dhe të mundësive të barabarta për të gjithë, përfshirë këtu edhe përfitimet nga programet e efiçiencës së energjisë.