Kryeministri i Republikës së Kosovës, Albin Kurti, i shoqëruar nga zëvendëskryeministrja, njëherësh ministrja e Punëve të Jashtme dhe Diasporës, Donika Gërvalla, në kuadër të Konferencës së Sigurisë në Mynih, u takua me kancelarin e Republikës Federale Gjermane, Olaf Scholz dhe ministren për Evropë dhe Punë të Jashtme të Francës, Catherine Colonna.
Në takim, siç njofton zyra e Kryministrisë është diskutuar për raportet mes Kosovës dhe Serbisë, për përgatitjet për takimin e radhës në Bruksel dhe për propozimin evropian për normalizim të marrëdhënieve.
Kurti ka falënderuar për mbështetjen dhe angazhimin e Gjermanisë dhe Francës dhe ka shtuar se “Republika e Kosovës si vend proevropian dhe proamerikan, mbetet e përkushtuar dhe konstruktive në dialog, teksa dëshiron marrëdhënie të mira fqinjësore dhe integrim në BE dhe NATO”.
Në takim u bisedua për progresin në vend, që është evidentuar edhe nga shumë organizata ndërkombëtare si dhe Raporti i Komisionit Evropian për Kosovën për vitin 2022, progres të cilin e përshëndeti kancelari Scholz.
“Rritja ekonomike, sundimi i ligjit, mbështetja sociale dhe demokratizimi institucional e shoqëror kanë avancuar gjatë dy viteve të fundit”, ka thënë kryeministri Kurti gjatë takimit me Scholz, njofton Kryeministria.
Ndër të tjera, ai e ka njoftuar kancelarin Scholz dhe ministren Colonna se “Qeveria e Republikës së Kosovës së fundmi ka miratuar tri marrëveshjet e nënshkruara më 3 nëntor në Berlin, që së shpejti do të ratifikohen edhe në Kuvend, duke dëshmuar kështu përkushtimin tonë për Procesin e Berlinit”.