Kryeministri i Kosovës, Albin Kurti, të enjten në mëngjes ka pritur në një takim në hapësirat e ndërtesës së Qeverisë, një grup nxënësish të shkollës fillore “Ismail Qemaili”.
Siç ka njoftuar Zyra e Kryeministrit, Kurti ka ndarë me nxënësit kujtime nga fëmijëria e tij, si dhe përvoja nga jeta profesionale në pozitën e kryeministrit të Kosovës.
“I lumtur, e sidomos kur njerëzit e tjerë bëhen të lumtur që po u ndihmoj dhe shërbej si kryeministër i Republikës së Kosovës”, ka thënë ai në pyetjen se si ndihet në pozitën e kreut të Qeverisë.
Fëmijët e klasës së parë të shoqëruar nga mësuesja Filloreta Mustafa Dërmaku, falënderuan kryeministrin Kurti për mundësinë dhe kohën për t’u takuar, derisa nxënësit përveç momenteve të këndshme e gazmore, i dhuruan kryeministrit edhe një punim arti të realizuar nga dora e tyre.
Gjatë këtij takimi, nxënësit e vegjël patën rastin të vizitojnë ndërtesën e Qeverisë dhe të njihen nga afër me ambientet e punës, përfshirë sallën e mbledhjeve të kabinetit qeveritar dhe qendrën për media.