Pas shpërthimit terrorist në kanalin e Ibër-Lepencit më 29 nëntor 2024, Prokuroria Speciale e Republikës së Kosovës ka ngritur aktakuzë më 8 dhjetor 2025 ndaj tre personave të dyshuar për këtë sulm.
Kryeministri në detyrë, Albin Kurti, në një postim në Facebook, deklaroi se hetimi është zhvilluar në bashkëpunim me institucionet e inteligjencës dhe sigurisë, si dhe me FBI-në e ShBA-ve, duke siguruar se të akuzuarit kanë qenë pjesë e strukturave ilegale të Serbisë.
“Mund t’ju siguroj se, në bazë të informacioneve të inteligjencës, të akuzuarit kanë qenë pjesë e strukturave ilegale të Serbisë dhe janë në mesin e të përfshirëve në realizim të sulmit. Procesi gjyqësor do ta dëshmojë se të akuzuarit ishin pjesë e strukturave ilegale të Serbisë, të lidhur ngushtë me mikun e Vuçiqit, terroristin Millan Radoiçiq, dhe strukturat tjera shtetërore të Serbisë që planifikuan dhe urdhëruan sulmin terrorist”, ka shkruar Kurti.
Ai ka shtuar se aktakuza dhe procesi gjyqësor do të vërtetojnë përfshirjen e tyre, përkundër mohimeve dhe përpjekjeve të Beogradit për të dezinformuar opinionin publik.