Shefja e Grupit Parlamentar të Lëvizjes Vetëvendosje(VV), Mimoza Kusari-Lila ka publikuar të dhënat e fundit të Fondacionit për Inovacion Politik me bazë në Francë.
Përmes një postimi në Facebook, ajo ka thënë se ky raport i publikuar së fundmi e ka nxjerrë Kosovën si shembull për Rajonin. Sipas saj, Kosova është shembull i demokracisë funksionale.
“Fondacioni për Inovacion Politik me bazë në Francë, që bën matje mbi çështjet politike, ekonomike dhe sociale të shteteve nëpër botë, në raportin e fundit në një sërë çështjesh e ka nxjerrë shumë mirë Kosovën”, ka shkruar Kusari-Lila.
Sipas raportit, thuhet se 89 për qind e qytetarëve të Kosovës ndjehen se mund të shprehen lirshëm.
“79 për qind e qytetarëve të Kosovës ndjehen se ndryshimet mund të bëhen nëpërmjet votës, ndërsa 73 përqind e qytetarëve të Kosovës besojnë që demokracia funksionon në vendin e tyre”, thuhet tutje në raport.
Sipas deputetes së VV, pas publikimit të këtij raporti, Kosova është vendi i lirisë dhe i demokracisë funksionale.