Në seancën e Kuvendit të Kosovës po diskutohet për themelimin e komisionit hetimor parlamentar për sektorin e energjisë.
Shefja e Grupit Parlamentar të Lëvizjes Vetëvendosje, Mimoza Kusari-Lila, ka thënë se çdo kërkesë e parashtruar nga opozita do të jetë pjesë e hetimeve, që do t’i bëjë komisioni për energji.
Por, sipas saj, ky komision do të jetë më i gjerë, dhe do të merret edhe me problemet e vjetra në sektorin e energjisë.
“Pajtohemi me secilin pretendim tuajin, megjithatë, nëse duam të jemi transparentë po e zgjerojmë gamën e hetimit. Në këtë aspekt kemi propozime konkrete, me gjithë propozimet tuaja. Në kuadër të propozimeve tona, të cilat lidhen edhe me rrethanat e trashëguara, mungesa e investimeve, largimi i investitorëve serioz e deri te nisja e ndërtimit të kapaciteteve të energjisë, mospërcjellja e planit investues të privatizuesit, është thënë se do të investohen 300 milionë euro a janë investuar ato”, ka deklaruar ajo.
Ajo iu kundërpërgjigj deputetit të PDK-së, Ferat Shala, i cili kërkoi të dijë se ku kanë shkuar mbi 100 milionë euro subvencione të Qeverisë, që ishin paraparë për sektorin energjetik.
Kusari-Lila tha se mjetet në fjalë janë në Qeveri të Kosovës, dhe sipas saj, kjo është lehtë e identifikueshme.
Ditë më parë, partitë opozitare PDK dhe AAK, kishin deklaruar se nuk janë kundër themelimit të një komisioni të iniciuar nga VV-ja, por, sipas tyre, së pari duhet të votohet themelimi i komisionit, sipas kërkesës së tyre.
Ndërkaq, përfaqësues të VV-së, kishin thënë se iniciativa e tyre për themelimin e komisionit do t’i përmbajë edhe kërkesat e opozitës.