Të enjten e 21 korrikut, Kuvendi i Kosovës do të mbajë vazhdimin e seancës dhe një seancë plenare të re.
E para do të nisë në orën 10:00, kurse seanca tjetër në orën 11:00.
Pikë diskutimi në seancën e re plenare do të jetë mosliberalizimi i vizave për qytetarët e Kosovës.
Pikat e tjera të rendit të ditës janë, shqyrtimi i dytë i Projektligjit nr. 08/L-065 për Produktet Biocide, shqyrtimi i dytë i Projektligjit nr. 08/L-120 për Ushqimin, propozimi për zëvendësimin e anëtarit në komision parlamentar, shqyrtimi i Propozim-rezolutës për adresimin e rritjes së çmimeve.
Pos tyre, gjatë seancës do të shqyrtohet edhe Raporti vjetor i Agjencisë për Informim dhe Privatësi për vitin 2021.
Po ashtu, do të bëhet shqyrtimi i Raportit vjetor të Ndërmarrjes Publike Operatori i Sistemit, Transmisionit dhe Tregut – KOSTT Sh.a. për vitin 2021, shqyrtimi i Vendimit të Qeverisë së Kosovës nr. 12/84, datë 22 qershor 2022 për hartimin e Planit Hapësinor të Kosovës, shqyrtimi i Vendimit të Qeverisë së Kosovës nr. 13/84, datë 22 qershor 2022 për hartimin e Planit Hapësinor për Parkun Kombëtar “Sharri”, ratifikimi i anëtarit të Këshillit Shtetëror të Cilësisë të Agjencisë Kosovare të Akreditimit.
Ndryshe, më 25 dhe 26 qershor të këtij viti është mbajtur Samiti i Bashkimit Evropian, por Kosova nuk e mori lajmin e shumëpritur për heqjen e vizave.
Ndonëse Kosova mbetet i vetmi vend në Evropë që ende nuk mund të lëvizë pa viza në vendet e BE-së, Qeveria e Kosovës vazhdimisht ka ritheksuar se ka plotësuar çdo kriter nga, gjithsejtë, 95 sa i ka vendosur BE-ja në udhërrëfyesin për liberalizim.
Megjithatë, procesi është penguar nga disa shtete anëtare të BE-së, sidomos nga Franca e cila i ka shprehur rezervat e saj për këtë çështje.