Emisari special i Bashkimit Evropian, Emisar Lajçak, pas takimit me zëvendëskryeministrin Besnik Bislimi, është deklaruar për media, ku ka treguar se për çfarë diskutuan.
Lajçak ka thënë se takimi ishte i fokusuar në dy çështje; se çfarë hapa duhet të ndërmerren që të zbatohet Marrëveshja Bazë dhe si duhet të veprojë Kosova që të përfitojë nga Plani i Rritjes i BE-së.
“Të rifukosohemi në procesin e normalizimit, se çfarë hapa konkretë do të marrim, kemi marrëveshje dhe duhet ta shpejtojmë zbatimin e saj, ishte një nga çështjet që diskutuam. Çështja e dytë ka të bëjë me planin e zgjerimit të BE-së me gjashtë miliardë euro investime, ku për Kosovën dhe Serbinë është kusht edhe konstrutiviteti në dialog, për atë jam këtu, për këtë kemi diskutuar si të sigurohemi që Kosova dhe Serbia do të marrin fonde nga ky plan”, ka thënë Lajçak.
I pyetur nga gazetarët nëse kjo do të jetë vizita e tij e fundit në Prishtina, Lajçak ka thënë se i është kërkuar që të qëndrojë deri në fund të janarit si emisar për dialogun Kosovë-Serbi.
“Nuk e besoj (që do të jetë vizita e fundit), sepse më kanë kërkuar që të qëndrojë deri në fund të janarit, ka shumë punë për të bërë”, ka shtuar Lajçak.
Lajçak gjithashtu foli për çështjen e hapjes së Urës së Ibrit, teksa theksoi se hapja duhet të bëhet në mënyrë që të mos përshkallëzohet situata dhe të krijohet një atmosferë e mirë në kuadër të dialogut.
“Hapja e urë ka të bëjë më marrëveshjen e vitit 2015 dhe 2016, qëndrimi ka qenë që të hapet, por kjo duhet të bëhet në mënyrë që të mos përshkallëzohet situata në terren. Kjo të bëhet në frymë të një atmosferë të mirë dhe në kuadër të dialogut”, ka shtuar Lajçak.