Analistja, Alma Lama ka thënë se gjuha e Kryeministrit të Kosovë, Albin Kurti e përdorur në mediat ndërkombëtare është e ekzagjeruar dhe njëherësh, edhe e tepërt. Si e tillë, do të bëhet shkas për largimin e investitorëve.
E ftuar në “FIVE” të RTV Dukagjini, Lama ka thënë se një gjuhë e tillë ku përmendet termi “luftë”, do të jetë i dëmshëm për Republikën e Kosovës dhe imazhin e saj në arenën ndërkombëtare ngase me terme të tilla ajo që është duke u dëmtuar është çështja e sigurisë, gjë e cila sipas Lamës, është një ndër pikat kyçe.
“Të gjitha adresimet e shqetësime do duhej të adresoheshin në takimet e brendshme, me diplomatë dhe me njerëz që e mbështesin Kosovën. Ndërsa gjuha e folur në media ndërkombëtare do duhej të ishte më e kujdesshme sepse pastaj është shumë më problem ta ndreqësh”, ka thënë Lama.
Nga takimi i planifikuar më 18 gusht në mes Presidentit të Serbisë, Vuçiq dhe Kryeministrit Kurti, Lama ka thënë se gjithçka çka pret janë mesazhet e qarta nga ana e Beogradit.
Ndër të tjera, ajo ka thënë se me një shtator, data për të cilën janë shtyer zbatimet e vendimeve mbi reciprocitetin, “do të vendoset në tryezën e bisedimeve por nuk mendoj se do të ketë zgjidhje pa pasur një marrëveshje Kosovë-Serbi, Serbia prapë do të përpiqet të destabilizoj vendin sepse për këtë ka investuar”.
Në mes të bisedave të “FIVE” është kujtuar edhe koha kur Kurti nuk përmendte dialogun si pjesë e planeve të tij në Qeveri.
“Ajo çka është thënë në fushata zgjedhore ka qene kauzë për të fituar votat nga votuesit. Kur Kurti ka ardhur në pushtet e ka kuptuar që dialogut nuk mund ti shmangej”, ka thënë Lama gjersa ka theksuar se “për fatin të mirë, nuk kemi të bëjmë me një politikan të padijshëm”.
Për sa i përket arritjes së një marrëveshje në mes Kosovës dhe Serbisë, Lama ka thënë se nuk do të realizohet përderisa vazhdon lufta Ukrainë-Rusi.