Sezoni 2025 në Formula 1 u mbyll me drama deri në xhiron e fundit. Ndërsa Lando Norris siguroi titullin e parë kampion në karrierë, Max Verstappen arriti sot fitoren e tij të tetë të këtij sezoni.
Holandezi dominon garën dhe e kalon vijën e finishit i pari, por kjo nuk mjafton për t’ia rrëmbyer titullin britanikut të McLarenit.
Verstappen e përfundon kampionatin vetëm dy pikë larg titullit të pestë radhazi, duke e mbyllur vitin me më shumë fitore se çdo pilot tjetër.
Norris, nga ana tjetër, shkon drejt historisë me sezonin e tij më të mirë deri tani, duke kurorëzuar një vit të jashtëzakonshëm me trofeun më të madh të sportit.
Piloti britanik, 26 vjeç, arriti vendin e tretë në garën finale – një rezultat i mjaftueshëm për t’i lënë pas rivalët e tij të drejtpërdrejtë për titull, Max Verstappen dhe shokun e skuadrës, Oscar Piastri.
Ky sukses e bën Norris kampionin e 11-të britanik në historinë e F1, ndërsa për McLaren shënon titullin e parë botëror që nga triumfi i Lewis Hamilton në vitin 2008, pra pas 17 vitesh pritje.
Edhe pse Verstappen dominoi garën, duke fituar nga pole-position dhe duke e mbyllur sezonin vetëm dy pikë pas Norrisit pas një rikthimi të furishëm në fazën e fundit të kampionatit, kjo nuk qe e mjaftueshme për ta mbajtur kurorën që e kishte fituar katër vitet e fundit.
Oscar Piastri, një tjetër pretendent për titull, e përfundoi garën i dyti pasi e kaloi Norrisin në xhiron e parë, por edhe ky rezultat nuk mjaftoi që australiani të përfshihej në garën për pikët vendimtare.
Megjithatë, vendi i tretë ishte gjithçka që i duhej Norrisit për të vulosur kampionatin.
Pas kalimit të vijës së finishit, ai nuk i fshehu emocionet në radion e ekipit, duke u shprehur “Ju faleminderit, oh Zot! Ma keni bërë ëndrrën realitet. Ju dua shumë. Faleminderit për gjithçka. Ju dua mami, ju dua babi… Nuk po qaj!”