Një veturë e blinduar e Njësisë Speciale të Kosovës, e cila operonte në “Lagjen e Boshnjakëve” në veri të vendit, ka vendosur të tërhiqet të martën.
Siç ka raportuar ekipi i terrenit të RTV Dukagjinit, pjesëtarët e Policisë së Kosovës tashmë kanë filluar të tërhiqen nga “Lagjja e Boshnjakëve”, në drejtim të jugut.
Një gjë të tillë raportohet se e ka kërkuar një pjesëtar amerikan i KFOR-it.
Ndërsa, siç ka raportuar REL-i, një pjesëtar i Policisë së Kosovës, ka thënë se bëhet fjalë për “riorganizim” të pranisë së tyre.
Ndryshe, Policia e Kosovës është sulmuar të martën në veri të vendit.
Siç shihet në pamjet e siguruara nga RTV Dukagjini, vetura e policëve fillimisht është bllokuar, e më pas një person ka gjuajtur me gurë në pjesën e pasme të saj duke thyer xhamin.
Ndërkaq, këtë të martë në veri është arrestuar një nga organizatorët e sulmeve ndaj pjesëtarëve të KFOR-it, Milun Milenkoviq – Llune, për të cilin ministri i Punëve të Brendshme, Xhelal Sveçla, ka thënë se është një nga udhëheqësit e formacionit kriminal “Mbrojtja Civile”.
Ministri i Brendshëm gjithashtu ka theksuar se gjatë arrestimit të tij, tre zyrtarë policorë janë lënduar lehtë.