Lidhja Demokratike e Kosovës e ka mirëpritur vendimin e Gjykatës Kushtetuese mbi Ligjin për Këshillin e Pavarur Mbikëqyrës për Shërbimin Civil të Kosovës.
Kushtetuesja këtij ligji ia rrëzoi disa nene, teksa LDK-ja në njoftim ka thënë se ky vendim përveçqë konfirmon shkeljet në një ligj jetik mbi pavarësinë e administratës, konfirmon edhe praktikën e Qeverisë të shkeljeve kushtetuese.
“Më 20 tetor 2023, deputetët e LDK-së depozituan rastin në Gjykatën Kushtetuese, duke argumentuar dhe faktuar të gjitha shkeljet kushtetuese të këtij Ligji. Vendimi i sotëm përveçse konfirmim i shkeljeve të rënda në një ligj jetik mbi pavarësinë e administratës shtetërore dhe shërbyesve civil, është dhe konfirmim i një praktike tashmë fenomen të shkeljeve kushtetuese nga Qeveria e Kosovës. LDK-ja siguron qytetarët e vendit se si themeluese dhe bartëse e Republikës, do të vazhdojë të jetë gardiane e Kushtetutës së Republikës.
Demokracia jonë shtetare nuk guxon të rrezikohet nga asnjë qeveri, aq më pak nga një qeveri populliste e me tendenca autokratike si kjo e tanishme, e cila për tri vite ka bërë tashmë plot 10 shkelje kushtetuese”, thuhet në njoftim e LDK-së.