Të enjten e 1 shtatorit, Kryetarja e Forumit të Gruas të LDK-së, Jehona Lushaku-Sadriu, në lidhje me mosfillimin e procesit mësimor dhe me mosekzekutimin e pagave për mësimdhënësit ka fajësuar Qeverinë e Kosovës, duke thënë se “Qeveria jonë përveç se nuk ka gatishmëri për dialogim, nuk ka adresuar as kërkesat e mësimdhënësve”.
Lushaku në një konferencë për media ka thënë se në këtë kohë kur Kosova është duke u ballafaquar me krizë ekonomike dhe krizë energjetike, mësimdhënësit janë dënuar me mosekzekutimin e pagave për shkak të papërgjegjshmërisë së qeverisë për dialog social.
“Për herë të parë në historinë e arsimit të Kosovës, pagat nuk janë ekzekutuar”, ka deklaruar ajo.
Ajo ka thënë se kjo e cenon dinjitetin e mësuesit, dinjitet i cili është munduar të mbrohet edhe në kohët më të vështira.
“Kjo tregon fuqinë e kësaj qeverie se sa jodemokratike është për të marrë vendime joligjore”, ka vijuar ajo.
Sipas saj, vendimi i ndaljes së pagave për punëtorët e sektorit publik, e sidomos të arsimit nuk ka asnjë bazë juridike.
Ajo i ka bërë thirrje Qeverisë që të bëhet menjëherë ekzekutimi i pagave për punonjësit e arsimit.
Ndër të tjera, ka theksuar se kjo ndalesë kolektive e pagave është e paprecedentë sidomos në një periudhë të tillë kur njerëzit kanë nevojë për pagë.
Ndërkaq, të mërkurën e 31 gushtit, Ministri i Financave, Hekuran Murati, ka thënë se ekzekutimi i pagave për këtë muaj është bërë vetëm i pjesshëm, për arsye se sipas tij, organizatat buxhetore nuk i kanë dërguar listat e atyre që kanë dalë në punë me kohë.
Po ashtu, më 25 gusht, Ministria e Financave ka kërkuar nga Këshilli Grevist listën e personave që po marrin pjesë në grevë, për t’ua ndërprerë pagën sipas nenit 18 të Ligjit për Greva.
Ministri Murati ka thënë se përderisa e drejta e grevës dhe grumbullimit është e garantuar me ligj, po ashtu praktikat dhe konventat ndërkombëtare nuk e obligojnë punëdhënësin që të paguajë punëtorin sa është në grevë.
Sipas tij, është obligim i sindikatës që t’i kompensojë grevistët.
Komunat nuk i dorëzojnë listat e grevistëve, Qeveria nuk i proceson pagat për ta