Ish-komandanti i Ushtrisë Çlirimtare të Kosovës, Sami Lushatku, e ka publikuar një xhirim të vitit 1994 ku shihet dëshmori i kombit Bekim Berisha i njohur me nofkën e luftës “Abeja”, duke folur për Kosovën.
“Mos fleni se çdo fillim është i vështirë, s’ka organizim, unë vetëm jam i larguar fizikisht se me shpirt atje qëndroj dhe atje jetoj”, dëgjohet të thotë dëshmori Berisha.
Në pamjet e vitit 1994 komandant “Abeja”, flet për lirinë e Kosovës, ku e thekson nevojën për vetëdije dhe rezistencë kombëtare.
“Arma më e fortë është kur zërin e ngritë për liri, ajo është arma më e fortë, kur je i vetëdishëm dhe kur thua se mëmëdhe nga ty nuk largohem”, kishte thënë komandanti Berisha.
Me humor dhe me mall për vendin e tij Kosovën Berisha fliste për jetën në mërgim.
“E di si është në mërgim isha edhe vetë, jam edhe tash edhe do të gjendemi, kështu pra e ka jeta jonë, lindja me robërinë, me përshëndetje me braktisje me metoda të ndryshme për Kosovë. Vij turist prej Bosnjes dhe Hercegovinës, i plagosur eci si pinguin, i plagosur për herën e tretë”, thoshte ai në videon e publikuar nga Lushtaku.
Kurse Lushtaku i cili edhe e ka publikuar videon, ka shkruar se komandanti “Abeja” nuk e duronte robërinë e as krimet mizore të Serbisë
“Një xhirim amator bashkë me Bekim Berishën-Abenë, në kohën kur organizimi i luftës çlirimtare po merrte përmasa edhe në mërgim. Abeja veç robërinë nuk e duronte, siç nuk duronte as krimet mizore serbe në ish-Jugosllavi, për çka edhe ju bashkua luftës në Kroaci e në Bosnjë. Siç dëgjohet edhe nga zëri i tij, Abeja mendjen e zemrën e kishte në organizimin e luftës edhe në Kosovë”, ka shkruar Lushtaku.
“Abeja” ishte njëri prej komandantëve më aktivë të Ushtrisë Çlirimtare të Kosovës (UÇK-së). Lindi më 15 qershor 1966 në fshatin Grabovc të Komunës së Pejës dhe ra dëshmorë më 10 gusht 1998 në Betejën e Junikut. Ishte njëri ndër luftëtarët më të dashur jo vetëm në Rrafshin e Dukagjinit, por në mbarë opinionin liridashës të Kosovës.
Mori pjesë në Luftërat e Kroacisë dhe Bosnjës, dhe më vonë në Luftën e Kosovës. Pas përfundimit të Luftës në Kosovë, Shtabi i Përgjithshëm i TMK-së e gradoi me gradën Gjeneral–Major.