Lëvizja Vetëvendosje ka reaguar ndaj vendimit të Gjykatës Kushtetuese që ka caktuar masë të përkohshme pas ankesës së Listës Serbe, duke e cilësuar atë në kundërshtim me funksionimin e Kuvendit.
Gjykata Kushtetuese vendosi të premten masën e përkohshme deri më 30 shtator, e cila ndalon çdo veprim të deputetëve për formimin e Qeverisë.
Kjo masë erdhi pas kërkesës së Listës Serbe për të shpallur kundërkushtetuese zgjedhjen e Emilja Rexhepit si nënkryetare nga grupi multietnik dhe për të urdhëruar kryeparlamentarin të përsërisë votimin për zgjedhjen e dy nënkryetarëve nga komunitetet, në një procedurë të përbashkët.
Vetëvendosje thekson se deri tani, me këtë pauzë, numri i ditëve të pritjes së vendimeve të Kushtetueses ka arritur në 112.
“Gjykata Kushtetuese që në krye të herës ka mbajtur anë duke marrë këtë vendim sot. Ndalimi i punës së 120 deputetëve është në kundërshtim të plotë me funksionalizimin e një nga institucioneve më të rëndësishme të shtetit siç është Kuvendi. Ky diktat i Gjykatës Kushtetuese që ka vendosur Kuvendin në pauzë pse Lista Serbe nuk mori votat e mjaftueshme për të pasur një Nënkryetar, po i çon në 112 ditët e pritjes së vendimeve të Gjykatës Kushtetuese, prej 15 prillit kur dhe filloi procesi i konstituimit të Kuvendit”, thuhet nga LVV-ja.
Partia paralajmëron se çdo interpretim që i jep Listës Serbe ekskluzivitet për propozimin dhe zgjedhjen e nënkryetarit do të krijonte një të drejtë vetoje për këtë parti, gjë që sipas VV-së nuk është e parashikuar nga Kushtetuta dhe nuk pasqyron frymën e organizimit të shtetit të Kosovës.
“Në tekstin prej 15 faqesh që Gjykata ka përgatitur për të përmbledhur faktet dhe arsyetimin e masës është paraqitur disa herë vlerësimi i ankuesve se atyre u takon ekskluziviteti i propozimit dhe zgjedhjes së Nënkryetarit. Kjo nuk është thënë as në Kushtetutë, kjo nuk është as fryma e organizimit të shtetit të Kosovës. Çdo interpretim e aktgjykim që do të shkonte në këtë drejtim do të ngurtësonte të drejtën e vetos në konstituimin e Kuvendit nga Lista Serbe. Kjo parti, dhe asnjë parti që ka vende të rezervuara në Kuvend nuk duhet dhe nuk e ka të drejtën e vetos për konstituimin e Kuvendit të Kosovës” thuhet tutje nga LVV-ja.