Ministrja e Arsimit, Arbërie Nagavci, ka njoftuar se kanë lansuar kornizën e cila do t’u mundësojë fëmijëve me nevoja të veçanta përfshirjen në shkollat e mesme të larta.
Sipas saj, dokumenti është hartuar nga ekspertë vendorë dhe ndërkombëtarë të arsimit, dhe se, sipas saj, qëllimi i tyre është që të rritet numri i fëmijëve me nevoja të veçanta në nivele më të larta të shkollimit.
“Ky është një bashkëpunim i rëndësishëm me partnerët tanë, Zyrën e Bashkimit Evropian dhe atë të Këshillit të Evropës, përmes projektit të përbashkët “Include”, sepse jam e sigurtë se ka gjithmonë vend dhe mundësi për të ofruar ndihmë edhe përtej të gjitha angazhimeve të Qeverisë dhe Ministrisë së Arsimit”, thuhet në postimin e Nagavcit në Facebook.
Tutje, e para e arsimit ka thënë se një dokument i tillë do t’u ndihmonte mësimdhënësve në Qendrat Burimore dhe asistentëve që merren me fëmijët me nevoja të veçanta, t’i njohin dhe t’i adresojnë nevojat e kësaj kategorie të fëmijëve.
Sipas saj, kjo do të mundësonte që ata të aftësohen për tregun e punës.