Gjysmë milion euro është vlera e kontratës që ShSKUK-ja e ka nënshkruar me kompaninë “MediHealth”, në emër të kontratës emergjente për furnizim me material për hemodializë.
Njoftimi për dhënien e kontratës është publikuar nga vet SHSKUK, në kohëzgjatje prej gjashtë muajsh e në vlerë prej 508,215.96 euro. (FOTO)
Por, Prokuroria Themelore në Prishtinë, konfirmoi për Dukagjinin se aktualisht është në fazën e hetimeve të para për këtë kompani, që dyshohet për falsifikim dokumentesh.
“Prokurori i Shtetit ka autorizuar Policinë e Kosovës për mbledhjen dhe grumbullimin e informatave relevante në lidhje me çështjen në fjalë. Aktualisht, Prokurori i Shtetit ndodhet në fazën e verifikimit dhe analizimit të kësaj procedure.”- Prokuroria Themelore e Prishtinës
MediHealth është pikërisht kompania që me 24 tetor dorëzoi ankesë në OSHP sepse nuk kishte arritur të fitonte kontratën e rregullt.
Kjo kompani mohon se është nën hetime dhe se furnizimin e kryen menjëherë mbrëmë dhe se gjatë kësaj periudhe ka ofruar edhe donacione për Qendrat e Hemodializës.
“Sa i përket çmimeve që kemi ofertuar, ato janë në përputhje me çmimet e rajonit, madje edhe më të lira. Për këtë, mund të kryeni edhe një hulumtim. Megjithatë, është e kuptueshme që çmimet tona nuk mund të krahasohen me çmimet e prodhuesve kinezë, pasi besojmë se jeni në dijeni që produktet kineze, që nga fillimi, kanë shkaktuar shumë probleme në funksionim. Për këtë çështje, mund t’i kontaktoni edhe Qendrat e Hemodializës. Vlen të përmendet që kompania jonë ka dorëzuar donacione për më shumë se 10 ditë, edhe pse Autoriteti Kontraktues kishte nënshkruar kontratë emergjente për furnizim me këto produkte me OE Medicom, i cili nuk i ka përmbushur kërkesat e tyre kontraktuale dhe nuk i ka sjellë produktet me kohë, duke i lënë Qendrat e Hemodializës pa këto materiale dhe duke rrezikuar seriozisht shëndetin e pacientëve që trajtohen me hemodializë.-MEDI-HEALTH
Kjo kontratë vjen pas shkëputjes së asaj me “Medicom”, e cila ndër të tjera akuzoi se punëtorë të SHSKUK-së punojnë për MediHalth.
Por, në një përgjigje për Dukagjinin, Adelinë Delijaj, e apostrofuar në këtë reagim, ka mohuar pretendimet. Ajo tha se AKPPM dhe Oda e Farmacistëve mund të vërtetojnë të dhënat për licencat e saj.
“Para se të drejtoni ndonjë pyetje apo të publikoni çfarëdo informacioni që lidhet me emrin tim, ju lus që të siguroni të gjitha të dhënat e sakta dhe zyrtare përmes organeve kompetente, përkatësisht AKPPM-së dhe Odës së Farmacistëve. Këto organe do të mund të vërtetojnë qartë se licenca ime nuk është aktive në asnjë operator ekonomik, dhe çdo pretendim i kundërt është plotësisht i pavërtetë. Nëse tentohet të njolloset emri dhe integriteti im profesional me informacione të pasakta, do të ndërmarr menjëherë veprime ligjore për dëmtim të imazhit, dhe do të merrem personalisht me këtë çështje në rrugë institucionale. Përpara se të publikoni informata të pasakta dhe të dëmshme për reputacionin tim, ju lus të verifikoni çdo të dhënë në institucionet ligjore përkatëse. Nuk është e vërtetë që malli është refuzuar. I njëjti mall është pranuar nga Barnatorja Qendrore më datë 10.07.2025, dhe për këtë ekzistojnë të gjitha dokumentet zyrtare të pranimit. Refuzimi i mallit në ditën e premte ka ndodhur vetëm për shkak të mungesës së dokumentacionit plotësues, pasi që malli nuk ka qenë në përputhje me specifikat e kërkuara sipas kontratës“.-Adelinë Delijaj – Zyrtare në SHSKUK
Se Delijajt i është shkëputur kontrata e ka konfirmuar për Dukagjinin edhe AKPPM-ja.
Për njohës të çështjeve të prokurimit, pa pasur një vendim gjyqësor, kompania “Medi Health” nuk mund të përjashtohet nga gara.
Në Agjencinë e Regjistrimit të Bizneseve të Kosovës, Kompania “Medi Health” figuron e regjistruar nga viti 2025, me pesë punëtor.