Gjatë kësaj të shtune ekipet e kërkim-shpëtimit kanë nxjerrë nga rrënojat më shumë të mbijetuar.
Numri i të vdekurve nga tërmeti i madh që goditi një rajon kufitar të Turqisë dhe Sirisë pesë ditë më parë, ka tejkaluar shifrën 25 mijë.
Në televizionin turk ishin duke u transmetuar pamje nga shpëtimet “dramatike”, duke e përfshirë shpëtimin e familjes Narli në Kahramanmaras qendrore, 133 orë pasi tërmeti me magnitudë 7.8 goditi të hënën.
Fillimisht u shpëtua fëmiu 12-vjeçari Nehir Naz Narli, më pas të dy prindërit e saj.
Rrjeti televiziv HaberTurk ka raportuar se kjo ngjarje ka pasuar me shpëtimin e një familjeje pesë anëtarëshe nga një grumbull mbeturinash në qytetin e goditur rëndë të Nurdagi, në provincën Gaziantep.
Në ato momente ekipet e shpëtimit brohorisnin, “Zoti është i madh!” pasi u shpëtua dhe anëtari i fundit i familjes, babai.
Presidenti turk Recep Tayypi Erdogan, në një turne në qytetet e goditura nga tërmeti, e rriti numrin e të vdekurve në Turqi në 22 mijë e 327, gjë që e çoi numrin e përgjithshëm të të vdekurve në të gjithë rajonin, duke përfshirë qeverinë dhe pjesët e kontrolluara nga rebelët në Siri, në 25 mijë e 880.
Presidenti Erdogan ka thënë se një fatkeqësi e kësaj përmase është e rrallë.
Ai e quajti atë si “katastrofën e shekullit” dhe tha se kishte prekur një zonë me diametër 500 kilometra (310 milje) që është shtëpia e 13.5 milionë njerëzve në Turqi dhe një numër i panjohur në Siri. AP