Policia e Kosovës ka njoftuar se që nga data 3 prill deri më 3 maj, ka shqiptuar gjithsej 36 mijë e 427 gjoba.
“Me qëllim të rritjes së sigurisë rrugore, mbrojtjen e jetës dhe zhvillimin normal të rrjedhës së trafikut, Policia e Kosovës gjatë muajit të parë të implementimit të ligjit të ri të trafikut, ka ndërmarrë fushata për vetëdijesimin dhe sensibilizimit e qytetarëve në respektim të rregullave dhe kontributit të përbashkët për parandalimin e aksidenteve në trafik.”
Policia e Kosovës apelon të gjithë pjesëmarrësit në trafik t’i respektojnë rregullat e trafikut.
“Policia e Kosovës, APELON të gjithë pjesëmarrësit në trafik t’i respektojnë rregullat e trafikut, sepse vetëm bashkërisht mund të kontribuojmë në sigurinë rrugore, duke shpëtuar veten dhe pjesëmarrësit e tjerë në trafik,” shkruhet në njoftim.
Nga këto gjoba, 27 mijë 003 janë shqiptuar për tejkalim shpejtësie, 4 mijë e 548 për mosvendosje të rripit të sigurisë, 2 mijë e 659 për përdorim të telefonit dhe të tjera.
Sipas Policisë, gjatë kësaj periudhe janë konfiskuar 639 mjete të paregjistruara, mes tyre: 511 vetura, 11 kamionë, 100 motoçikleta dhe 5 trotinetë elektrikë.
Ligji i ri për rregullat e trafikut rrugor ka hyrë në fuqi nga prilli i këtij viti.
