Rripi i Gazës vazhdon të përballet me pasojat shkatërruese të ofensivës izraelite, ku numri i të vdekurve ka kaluar shifrën 70 mijë, njofton ministria e shëndetësisë e enklavës.
Që nga e enjtja, 301 persona të tjerë janë shtuar në bilancin e viktimave, duke e çuar numrin total në 70 mijë e 100.
Dy prej tyre humbën jetën gjatë sulmeve të fundit izraelite, ndërsa të tjerët u identifikuan nga mbetjet e varrosura në rrënoja.
Izraeli ende nuk ka komentuar mbi këto shifra, duke vënë në dyshim saktësinë e të dhënave nga Gaza, por nuk ka publikuar ende një vlerësim të vetin, shkruan Reuters, transmeton Dukagjini.
Ministria e shëndetësisë në Gaza njofton se shumë nga trupat janë identifikuar nga rrënojat, pasi bombardimet izraelite kanë shkatërruar pjesën më të madhe të qyteteve, duke e bërë të vështirë mbledhjen e informacionit mbi viktimat. Në fillim, zyrtarët regjistruan trupat që mbërrinin në spitale, ndërsa më pas pritën për verifikime forenzike dhe ligjore për të përfshirë mijëra viktima të raportuara në bilancin zyrtar.
Që nga arritja e armëpushimit të brishtë më 10 tetor, numri i të vdekurve ka vazhduar të rritet, pasi autoritetet shfrytëzojnë qetësinë relative për të kërkuar trupat në rrënoja.
Kujtojmë se lufta nisi pas sulmit të Hamasit më 7 tetor 2023, ku u vranë mbi 1 mijë e 200 persona, shumica civilë, dhe u rrëmbyen 251 pengje.
Autoritetet izraelite mohojnë të kenë synuar civilët gjatë këtij konflikti. Ekspertët e shëndetit publik theksojnë se Gaza, para luftës, kishte statistika dhe sisteme shëndetësore më të avancuara se shumica e vendeve të Lindjes së Mesme.
OKB-ja i konsideron shifrat e ministrisë së shëndetësisë si të besueshme.