Distria Krasniqi ka shkëlqyer në Grand Slamin e Parisit, duke fituar medaljen e artë në kategorinë deri në 52 kilogramë, në garat e zhvilluara të shtunën.
Pas një paraqitjeje të fortë gjatë gjithë turneut, xhudistja kosovare e kurorëzoi suksesin në finale, ku e mposhti spanjollen Ariane Toro Soler me Ippon pas vetëm 10 sekondash luftë, njofton Dukagjini.
Me këtë fitore, Distria vazhdon të forcojë statusin e saj si një nga garueset më të suksesshme në historinë e këtij turneu prestigjioz, duke arritur në nëntë medalje të fituara në Grand Slamin e Parisit.
Federata Evropiane e Xhudos ka shpërndarë pamje nga finalja, duke e vlerësuar atë si “mbretëreshën e Parisit”.
“Mbretëresha e Parisit: nëntë medalje deri më tani, katër prej tyre të arta”, thuhet në postimin e federatës.