Në konferencën vjetore ndërkombëtare “FSK dhe partnerët 2022”, e organizuar nga Ministria e Mbrojtjes dhe FSK-së, ministri i këtij dikasteri, Armend Mehaj, ka thënë se FSK po e rrit profesionalizimin.
Teksa ka falënderuar anëtarët e të gjitha vendeve për përkrahjen e FSK-së, Mehaj një falënderim të veçantë ia atribuoi Shteteve të Bashkuara të Amerikës për forcimin e FSK-së dhe procesin e anëtarësimit në NATO.
“Ne po rrisim profesionalizmin, kapacitetet tona, na keni premtuar dhe keni aprovuar pakon legjislative në veçanti me konstituimin dhe harmonizimin e këtyre kërkesave në procesin drejt NATO-s”, ka thënë Mehaj.
“Do t’ju falënderoja për bashkëpunimin me partnerët tanë për paqen, stabilitetin dhe paqen ne rajon. Siç e dini, Kosova është një vend i vogël, por me zemër dhe me vlera të larta. Të nderuar me këtë rast falënderoj ShBA-në dhe aleatët, faleminderit për forcimin e FSK-së”, shtoi ai.
Mehaj ka potencuar se Kosova është një vend i vogël por me zemër e vlera të mëdha.
Në anën tjetër, shefi i shtabit të KFOR-it, John Boziceviq, ka thënë se ndonëse KFOR-i ka ndihmuar personelin mjekësor të FSK-së në të kaluarën, edhe në të ardhmen do të gjejnë alternativa të tjera të bashkëpunimit për paqe dhe prosperitet.
Ndërkaq, drejtori i NALT-it, Joachim Hoppe, ka thënë se ky ekip ndërlidhës i NATO-s është i gatshëm për të ndihmuar në zhvillimin e mëtutjeshëm të FSK-së në edukim dhe trajnim.
“Qëllimi ynë është të formësojmë FSK-në që ndihmon paqen dhe sigurinë në bazë të principeve fundamentale, sundimit të ligjit, të drejtave të njeriut, dhe po punojmë në baza ditore për ta arritur këtë qëllim”, ka thënë ai, shkruan KP.
Sipas tij, bashkëpunimi bilateral është i rëndësishëm për Kosovën.