Ministri i Mbrojtjes, Armend Mehaj, ka pritur në takim ambasadorin e Britanisë së Madhe, Nicholas Abbott.
Mehaj dhe Abbott kanë diskutuar për situatën e sigurisë në veri të vendit dhe “nevojën për normalizimin e gjendjes”.
“Ambasadori Abbott shprehu shqetësimin e tij për gjendjen në veri të vendit dhe nevojën për gjetjen e një rrugëzgjidhje për të kthyer normalitetin për të mirën e të gjithë qytetarëve të vendit, por dhe të partneritetit në mes Kosovës dhe vendeve të NATO-s”, ka shkruar Mehaj.
Mehaj ka njoftuar ambasadorin Abbott për zhvillimet në Ministrinë e Mbrojtjes dhe Forcën e Sigurisë së Kosovës dhe i ka rikonfirmuar aspiratat e qytetarëve dhe institucioneve të vendit për integrim në Programin e Partneritetit për Paqe dhe NATO.
“Diskutuam për bashkëpunimin me Britaninë e Madhe dhe vendet partnere të NATO, si dhe mbështetjen e vazhdueshme që Britania dhe vendet partnere po japin për FSK-në, zhvillimin e saj dhe ndërtimin e kapaciteteve në përputhje me standardet dhe doktrinën e NATO-s”, shtoi tutje ai.