Ministri i Mbrojtjes, Armend Mehaj, ka njoftuar se gjatë vizitës në Bruksel, ka takuar bashkatdhetarët në këtë vend.
“Gjatë vizitës në Bruksel takova të rinj e të reja, bashkatdhetarë tanë e qytetarë të Brukselit, të cilët përveçse asnjëherë nuk harrojnë prej nga vijnë, dhe mbajnë gjallë artin e kulturën shqipe përmes organizimit në shoqata”, ka thënë Mehaj.
Ministri Mehaj ka shtuar se bashkatdhetarët vazhdojnë të ofrojnë kontributin e tyre në Kosovë, “si atdheun më të shenjtë, që pavarësisht distancës gjeografike, mbetet gjithmonë afër zemrës së tyre”.
“Historikisht mërgata ka qenë mbështetja jonë më e madhe”, ka theksuar Mehaj.
“Përvoja e tyre, kuadrot e reja dhe mundësitë e pafundme për të investuar në Kosovë, përbëjnë faktor të rëndësishëm drejt përmbushjes së synimit tonë të përbashkët për një shtet zhvillimor që ofron mirëqenie e barazi për të gjithë. Përjetësisht mirënjohës ndaj mërgatës tonë!”.