Ministri i Mbrojtjes, Armend Mehaj, është pritur në takim nga ministri i Mbrojtjes i Republikës së Italisë, Guido Crosetto.
Me anë të një komunikate për media, bëhet e ditur se pjesë e diskutimit ishte thellimi i bashkëpunimit në mes dy vendeve në fusha të caktuara.
“Në këtë takim, ministri Mehaj dhe homologu i tij italian diskutuan rreth bashkëpunimit në fushën e mbrojtjes, edukimit dhe trajnimit të ushtarakëve të FSK-së në fusha specialistike, forca speciale, aviacion e mjekësi. Gjithashtu, ministri Mehaj shprehu edhe njëherë gatishmërinë në ofrimin e trajnimeve në fushën e kërkim-shpëtimit urban, deminimit dhe eliminimit të materieve të rrezikshme”, thuhet në komunikatë.
Krahas kësaj, dyshja biseduan edhe për situatën aktuale gjeopolitike, luftën në Ukrainë dhe rëndësinë e unitetit për mbështetjen e ukrainasve në luftën kundër agresorit rus.
Mehaj ritheksoi qëndrimin e Kosovës kundër politikave ruse, si dhe përmendi pranimin e refugjatëve dhe integrimin e gazetarëve ukrainas në Kosovë, gjersa falënderoi ministrin Crosetto për mbështetjen e deritanishme të ofruar nga shteti italian.
Gjithashtu, në këtë vizitë ishin edhe zv.komandanti i FSK-së, gjeneralmajor Enver Cikaqi, ambasadorja e Kosovës në Itali, Lendita Haxhitasimi dhe zyrtarë të lartë të Ministrisë së Mbrojtjes.